樓宇復修能有效減少因舊樓失修而構成的安全問題，從而減慢樓宇老化。另外，改善樓宇設施更令物業得以保值，甚至增值。惟很多業主在進行大廈維修時，總遇上林林總總的難題，需要專業人士協助排難解紛。

林太居於油麻地新填地街一幢樓齡達50年的唐樓。在大維修前，樓宇因日久失修，出現石屎剝落、水渠淤塞等毛病，其中外牆滲水問題最為嚴重。「最誇張係外牆個水斗，可以生咗一大棵草遮住個窗。」另外，大廈的基本設施欠奉，既沒有電梯，亦沒有消防設備，就連最基本的樓梯燈也欠奉。「最唔忿氣日日行樓梯黑蚊蚊冇燈，要自己裝燈，仲要拉我屋企啲電用，咁樣每個月要交多好多電費。」

2009年屋宇署發出命令，要林太和眾業主為大廈外牆進行維修，當時感到十分無助。「我哋班業主咩都唔識，又冇錢整。我先生喺為勢所迫下做咗法團主席，班街坊就旨意哂佢同個秘書搞掂，真係唔知點算，咪搵市建局傾下囉。」

負責處理林太所住大廈個案的樓宇復修經理李世忠，表示當時了解有關大廈的情況後，建議法團參加政府推出的『樓宇更新大行動』。

「參加咗『樓宇更新大行動』嘅大廈，60歲以上自住業主可得維修費的全數或最多$40,000的津貼，60歲以下都有最多8成維修費或$16,000。」林太表示其大廈很多「老」業主，有資助幫補樓宇維修的龐大開支，很多人都鬆了一口氣。

解除了資金的憂慮後，就要著手進行招標揀選顧問公司。「當時有14間顧問公司報價，其中最平果間報$6,000，但最貴果啲收成十幾廿萬，我哋一班業主諗住梗係揀間平架啦。因為除開每伙都唔駛$200蚊。」林太隨即將法團意向告知市建局，市建局便協助進行有關顧問收費、工程組織及人力架構的分析。最後法團轉為揀選另一間收費較合理的公司。

「市建局俾咗好多資料我哋睇，等我哋班業主明白，用$6,000去請一個專業顧問係唔合理。由籌備到工程完成後保固期起碼兩年多時間，根本係無可能亦唔尋常，最重要係會大大提高日後被承建商圍標嘅風險。最終我哋法團都揀咗間收費較合理、盡責嘅顧問。」

「到招聘工程承建商時，我哋班業主又諗住平嘢無好嘢，怕價錢太平承建商唔夠價做會爛尾收場。所以揀咗足足貴最低標75萬嘅第三標。好彩市建局有提供大廈維修工程市場價格估值俾我哋參考，最後揀番最低標，而家計番每戶慳番兩萬幾蚊添。大廈在2012年完成咗維修，成座大廈光猛晒乾淨晒，住都住得舒服啲。啲業主十分滿意。」林太感謝市建局團隊的協助，踏出大廈維修成功的第一步。

2013年，法團收到消防安全指示，要求改善大廈的消防設施及系統，遂再次與市建局商討，發現「樓宇維修綜合支援計劃」內的「公用地方維修津貼」有最多每戶$3,000資助維修工程，所以遞表參加。「有咗第一次維修大廈嘅經驗，又有市建局提供財政及技術支援，我哋好有信心可以順利做好今次消防系統嘅改善工程。」林太表示所住樓宇愈來愈「四正」，住得開心又放心，捨不得搬走。

關先生在大角咀橡樹街經營夜冷舖多年，曾飽受樓宇失修問題困擾。「以前個排水渠有問題，天井成日積水，衛生情况又差，惹晒啲老鼠曱甴。有一日落完雨開舖，一拉開度閘有十幾隻老鼠企响我面前跳舞。」

關生舖頭所處的大廈多年來衛生環境惡劣，業主們想維修，但苦無頭緒，不知從何入手。直至2010年大廈業主收到屋宇署的修葺令，有業主提議可以揾市建局幫手，維修之路才見曙光。

「我哋班業主去咗聽市建局有關樓宇復修嘅講座，知道市建局『樓宇維修綜合支援計劃』嘅『公用地方維修津貼』可以協助舊樓業主進行維修。參加咗計劃嘅業主，除咗有維修津貼幫輕財政負擔外，更重要嘅係有嘢唔明可以有人問。」關生感謝市建局樓宇復修助理經理沈文堂和高級主任秦文廣在維修期間提供的協助，令大廈維修得以順利完成。

「關生同一眾業主開初對維修工作唔了解，於是我哋提供樓宇復修嘅資訊，令佢哋對計劃內容、維修安排同程序等有初步認識。我哋亦透過出席法團嘅會議，向業主講解籌組維修嘅步驟同埋要留意嘅事項，亦會解答有關維修嘅疑問。」沈文堂十分欣賞大廈業主很齊心，很多事情均有商有量，一起討論，一起處理，所以揀選顧問及承建商的過程均十分順利。

法團於2012年7月聘得建築顧問，於2013年4月亦聘請了維修承建商，但工程期間，承建商的持牌人(又稱「獲授權簽署人」)突然離任，頓令業主們不知所措，除聽取顧問公司意見外，法團也向市建局查詢。「獲授權簽署嗰個人又會無端端走咗，咁個承建商咪突然間變咗無牌!單工程做到一半，我哋都唔知點算好?」

「當時我哋即刻向監工嘅顧問公司了解一下發生咗咩事，再睇下應該為法團提供咩意見。」沈文堂憶述當時承建商只是人事上作調動，為令工程可繼續進行，顧問公司在合約上作了特別安排，與原工程合約承建商及二判作出協調繼續施工，直至原合約承建商聘獲另一「獲授權簽署人」為止。「好彩個顧問幫我哋睇住，又做好文件工作。有唔明嘅地方我哋又問下市建局。」關生表示業主經此一役更明白聘用稱職專業顧問的重要性。

大廈最終亦於2013年11月順利完工。「你哋上去睇下個天台，而家整咗個防水地台好靚㗎。」關生與眾業主對維修後的大廈感到十分滿意，多年來的衛生問題亦得到解決，生活環境得以改善。

擁有同座樓宇另一單位的法團秘書關小姐道：「因為呢次維修，令我哋樓上樓下業主多咗了解，感情仲好咗𠻹！」

自2011年4月，市建局及香港房屋協會合作推出一套統一而全面的「樓宇維修綜合支援計劃」，當中包括財政資助及技術支援。業主只需填妥一套綜合計劃的申請表格，便能作出多項申請，包括由房協管理的「長者維修自住物業津貼計劃」及屋宇署的「樓宇安全貸款計劃」。

現時市建局負責處理的綜合計劃申請，範圍已擴展至葵青、荃灣及整個九龍區，預計在2015年年中服務範圍會覆蓋全港。有心想做好維修的業主，可致電「 樓宇維修支援計劃熱線」 3188 1188查詢申請詳情及有關資料。市建局更於2014年推出「樓宇復修資訊通」網站，讓業主可以隨時隨地搜尋樓宇復修資訊和合適的資助計劃。